एजेन्सी–
विश्वकप २०१४ को दाबेदार टिमका रुपमा हेरिएको ब्राजिलले सेमिफाइनलमा लज्जास्पद  हार व्यहोरेको छ । खेलमा हार–जीत स्वभाविक प्रक्रिया हो । तर विश्वकप इतिहासमै ब्राजिलले ब्यहोरेको यो अप्रत्यासित फराकिलो हारले यसका समर्थकमा गहिरो पीडा दिएको छ । नेमारसहित टिमका केही भरपर्दा खेलाडीबिनै मैदानमा उत्रिएको टोलीले फराकिलो ७–१ को पराजय व्यहोरेपछि ब्राजिल समर्थकहरुको मनमा खिन्नता छाएको मात्र छैन,छियाछियासमेत भएको छ ।  ।ब्राजिलको टोलीले विश्वकप जित्ने विश्वासविपरित अहिलेसम्मकै अप्रत्यासित ठुलो हार व्यहोर्दा यसका खेलाडी र समर्थकहरु समालिनै नसक्ने गरी विह्वल बनेका छन् । मंगलबार भएको खेलमा पराजयपछि ब्राजिलका खेलाडी र समर्थकहरुमा अप्रत्यासित पराजयले दिएको चोट गहिरो देखिन्थ्यो ।

विश्वकपको इतिहासमा अहिलेसम्म भएका सबै खेलमा सहभागि हुन सफल ब्राजिलले हार्दा ब्राजिल समर्थकमा सन्नाटा मात्र छाएको थिएन,खेलाडीदेखि समर्थकका आँखामा आँसुका भेलबाडी बगिरहेका थिए । अप्रत्यासित हारले निकै नै स्तव्ध र भयभित बनेका खेलाडीलाई सम्हाल्न ब्राजिलका प्रशिक्षक लुइज फिलिप स्कोलारीलाई निकै नै हम्मे परेको देखिन्थ्यो । ब्राजिलका क्याप्टेन डेभिड लुइजको समालिनै नसक्ने गरी झरेको आँसुले त जोकोहीलाई छोएको थियो ।