कहिल्यै नव्याएको कोरली वाच्छीले दुध दिन थालेपछी ...........

सप्तरी, साउन २६ –

कञ्चनरुप नगरपालिका–८ स्थित रुपनगरमा एउटा बाछीले बिना ब्याएरै दूध दिन थालेपछि स्थानीय जनता अचम्मित बनेका छन् । गाईलाई दूध दिन बाछा वा बाछी जन्मिनु पर्दछ तर, गर्भाधारणसमेत नगरेको बाछीले एक्कासि दूध दिन थालेपछि स्थानीय जनता अचम्मित बनेका हुन् । कञ्चनरुप नगरपालिका–८ निवास मुरारी पोखरेलले पालेको बाछीले विगत दुई महिनादेखि दूध दिँदै आएको छ । “थुन बाक्लिएको देखेपछि छुन जाँदा दूध पो निस्कियो,” पोखरेल भन्नुहुन्छ – “त्यसपछि दूध दुहुन थाल्दा दुई लिटरसम्म दूध निस्कियो ।” गत २०७१ जेठ महिनादेखि दूध दिन थालेको बाछीले अहिले दैनिक चार लिटरसम्म दूध दिँदै आएको पोखरेलको भनाइ छ । उनले भने – “गत २०७० फागुनमा बाछीसँग साँढे लागेको थाहा छ, तर बाछीले अहिलेसम्म गर्भाधारण गरेको छैन । नब्याएरै बाछीले दूध दिन थालेपछि त्यो हेर्न दैनिक सर्वसाधारणको भीड लाग्ने गरेको छ ।” बिहान दुई लिटर र बेलुका दुई लिटर गरी बाछीले दिने चार लिटर दूध पोखरेलको परिवार आफैले उपभोग गर्दै आएका छन् । अन्य गाईको भन्दा बाछीले दिएको दूध राम्रो भएको उहाँको भनाइ छ । गत २०६९ मा गाउँमै नन्दराज सङ्ग्रौलाको घरमा पुराण लागेको थियो । सङ्ग्रौलाले पुराण वाचन गर्ने पण्डितलाई दान गरेको यो बाछी पण्डितले घर टाढा रहेको भन्दै पोखरेललाई रु पाँच हजार ५०० मा बेचेका थिए ।रासस