काठमाडौं, साउन २४– एमाले नेता तथा सभासद राजेन्द्र पाण्डेले गुण्डा नाइके दिनेश अधिकारी चरी मृत्यु प्रकरण मानवअधिकारसँग जोडिएको मुद्दा भएको बताएका छन् ।
उनले चरी प्रकरणलाई उचाल्दा आफ्नो छबी र प्रतिष्ठामा कुनै फरक नपर्ने भन्दै प्रहरीले आपराधिक गतिविधिमा संलग्नहरुलाई कानुब बमोजिम कारबाही गर्नु पर्ने बताए । शनिबार नयाँ पत्रिकामा प्रकाशित अन्तरवार्तामा भनिएको छ–यो मानवअधिकारसँग जोडिएको मुद्दा हो, यसलाई उचाल्दा मेरो छबी बिग्रीयोस् मलाई चिन्ता छैन ।

उनले आफूलाई गुण्डाको संरक्षक भनिएपनि केहि फरक नपर्ने बताउँदै आफ्नो राजनीति खुला किताव जस्तै भएको बताए । ‘मलाई गुण्डाको संरक्षक भनून केहि फरक पर्दैन,’ उनले भने,‘मेरो छबीको कसैले चिन्ता लिइदिनु पर्दैन, मेरो राजनीतिक जीवन खुला कितावजस्तै छ ।
उनले घटना नियोजित भएको भन्दै न्यायिक छानबिन समिति गठन गर्नुपर्नेमा जोड दिँदै गृहमन्त्रीले शुक्रबार संसदमा दिएको जवाफ चित्तबुझ्दा  नभएको बताए । उनले चरी प्रकरणलाई त्यत्तिकै सेलाउन नदिने भन्दै आगमी साउन २७ गतेको संसद बैठकमा पनि जोडदार रुपमा आवाज उठाउने बताए ।
उनले घटनकै विषयलाई लिएर तत्काल गृहमन्त्रीको राजनीमा माग्ने पक्षमा नरहेपनि आफूहरुको आवाजको सम्बोधन नभए आफ्नै पार्टीका गृहमन्त्री भएपनि राजीनामाको माग पनि आउन सक्ने चेतावनी बताए । उनले भने– अहिले गृहमन्त्रीको राजीनामा मागेका छैनौं, २७ गतेको संसद बैठकमा फेरि आवाज उठाउँछौं, यसमा गृहमन्त्री नै पूर्ण जिम्मेवार व्यक्ति हो, रहँदाबस्दा उनको राजीनामाको माग पनि आउन सक्छ ।